कैलाली । कैलालीमा पोखरीमा डुबेर बेहोस भएका दुई बालिकाको मृत्यु भएको छ ।

जिल्लाको लम्कीचुहा नगरपालिका–८ मलभङ्गा गाउँको पोखरीमा डुबेर बेहोस भएका उनीहरुको उपचारका क्रममा सोमबार राति मृत्यु भएको हो ।

मृत्यु हुनेमा मलभङ्गा गाउँका लालबहादुर विष्टकी सात वर्षीया छोरी आश्रिया र भीमबहादुर कुवँरको छ वर्षीया छोरी भावना रहेको जिल्ला प्रहरी कार्यालयका प्रवक्ता बेदप्रकाश जोशीले जानकारी दिए ।

गाउँमा रहेको इँटाभट्टामा खेलिरहेको अवस्थामा नजिकै रहेको पोखरीमा सोमबार बेलुका बालिका डुबेको देखेपछि स्थानीयवासीले उद्धार गरी बर्दगोरियास्थित खापर हेल्थ क्लिनिकमा पुर्‍याएका थिए ।

क्लिनिकमा उपचारका क्रममा राति मृत्यु भएको प्रहरीले जनाएको छ ।