काठमाडौं । लेवनान पुगेका प्रधानसेनापति प्रभुराम शर्माले राष्ट्रपति मिसेल अउनसँग शिष्टाचार भेटवार्ता गरेका छन् । नेपाली शान्ति सैनिकहरूको काम अवलोकन गर्न त्यहाँ पुगेका प्रधानसेनापति शर्माले आज राष्ट्रपति अउनसँग शिष्टाचार भेट गरेका हुन् ।

उक्त भेटवार्ताको क्रममा लेवनानद्वारा नेपाली शान्ति सैनिकहरूको योगदान, विशेषगरी त्यहाँको शान्ति स्थापनाका लागि ३१ जना नेपाली शान्ति सैनिकहरूले गरेको बलिदानको प्रशंसा गरेको नेपाली सेनाले जनाएको छ ।

राष्ट्रपति अउनले लेवनानी स्थानीय समुदाय र नेपाली शान्ति सैनिकहरूबीच उत्कृष्ट सम्बन्ध, पर्यावरण संरक्षण र अन्य सामुदायिक परियोजनाहरूमा नेपाली शान्ति सैनिकहरूले पुर्‍याएको योगदानको समेत उच्च प्रशंसा गरेको सेनाले जनाएको छ ।

सोही क्रममा प्रधान सेनापति शर्माले नेपालका राष्ट्रपतिको तर्फबाट लेवनानका राष्ट्रपति तथा सम्पूर्ण लेवनानी जनतालाई पठाएको सद्भावना सन्देश जानकारी दिएका थिए । शर्मा असार ४ मा लेवनान प्रस्थान गरेका थिए ।