काठमाडौं । क्रोएसिया पठाइदिने भन्दै दुई लाख रुपैयाँ लिएर फरार भएका एकजना पक्राउ परेका छन् ।

पक्राउ पर्नेमा मोरङको विराटनगर महानगरपालिका–२० का घर भइ हाल काठमाडौं महानगरपालिका–१० बस्दै आएका ३६ वर्षीय उत्सव दाहाल रहेको प्रहरीले जनाएको छ ।

उनलाई बिहीबार काठमाडौं महानगरपालिका–१६ बालाजुबाट पक्राउ गरिएको हो । उनले अजय वाइवालाई वैदेशिक रोजगारीका लागि क्रोएसिया पठाइदिने भन्दै दुई लाख रुपैयाँ लिएका थिए ।

रकम लिएपछि फरार भएका दाहालविरुद्ध वाइवाले आफू ठगीमा परेको भन्दै जाहेरी दिएका थिए ।

थप अनुसन्धानका लागि उनलाई वैदेशिक रोजगार विभागमा बुझाइएको महानगरीय अपराध अनुसन्धान विभागले जनाएको छ ।