चितवन । सेप्टिक ट्यांकी सफा गर्ने क्रममा बुधबार चितवनमा दुई जनाको निधन भएको छ ।

चितवन जिल्ला प्रहरी कार्यालयले दिएको जानकारी अनुसार मृत्यु हुनेमा कपिलवस्तु शिवराज नगरपालिका-९ बस्ने २४ वर्षका छतिराम थारू र २३ वर्षका राम चौधरी रहेका छन् ।

भरतपुर महानगरपालिका-१९ तमुटोल बस्ने राम प्यारी गुरुङको घरमा सेफ्टी ट्याङ्की सफा गर्ने क्रममा छतिराम चिप्लिएर सेफ्टी ट्याङ्कीमा खसेका थिए ।

छतिराम खसेपछि उनलाई झिक्न भन्दै राम चौधरी ट्यांकीमा छिरेका थिए । छतिराम र राम साला-भेना रहेको बुझिएको छ ।

प्रहरी, सेना र स्थानीय बासिन्दाको सहयोगले दुबै जनाको शव निकालिएको थियो । दुवै जनाको शव पोष्टमार्टमका लागि भरतपुर अस्पताल लगिएको प्रहरीले जनाएको छ ।