अछाम । अछामको पञ्चदेवल विनायक नगरपालिका–४ का विनोद शाहीको शव पोस्टमार्टमका लागि उठाउने सहमति भएको छ ।

मृतकका आफन्त र प्रशासनबीच शवको परीक्षण गर्ने, घटनाको छानबिन गर्ने र आवश्यकता अनुसार कानुनी कारबाहीको प्रक्रिया अघि बढाउने विषयमा सहमति भएको जिल्ला प्रहरी कार्यालय अछामका प्रहरी निरीक्षक कैलाश विष्टले जानकारी दिए ।

जेठ १७ गते साँझ नेपाली कांग्रेस र नेकपा एमालेका कार्यकर्ताबीच पञ्चदेवलमा भएको द्वन्दपछि बेपत्ता भएका शाहीको शव शनिबार बिहान स्थानीयले फेला पारेका थिए ।

मध्य पहाडी राजमार्गमा पर्ने पञ्चदेवल विनायक नगरपालिकाको वडा नम्बर ४ कुच्चीको भिरको खोँचमा उनको शव फेला परेको थियो । मृतक किशोरका आफन्तले काँग्रेसको योजना अनुसार हत्या भएको आरोप लगाएका छन् ।

उक्त घटनाको अनुसन्धान गर्न काठमाडौंबाट केन्द्रीय अनुसन्धान ब्युरोबाट प्रहरी नायब उपरीक्षकको कमान्डमा टोली खटिएको छ ।

शव जिल्ला अस्पताल पुर्‍याए पनि पोस्टमार्टमको प्रक्रिया भने सुरु भएको छैन । पीडितका आफन्तले किटानी जाहेरी दर्ता भएपछि मात्रै पोस्टमार्टम गर्न दिने अडान राखेपछी पोस्टमार्टम रोकिएको हो ।

पीडित पक्ष किटानी जाहेरी दर्ताको माग गर्दै प्रहरी प्रशासनमा गएका छन् ।