काठमाडौं । उच्च अदालत पोखराले नाबालिगमाथि जबरजस्ती करणीको आरोप लागेका अभिनेता पल शाहलाई थुनामै राख्न राख्न आदेश दिएको छ ।

उच्च अदालत पोखराका न्यायाधीश उज्ज्वल शुक्ल र श्रीधरा कुमारी पुडासैनीको संयुक्त इजलासले उनलाई थुनामा पठाउने जिल्ला अदालत तनहुँ र नवलपुरको आदेश सदर गरेको हो ।

मुलुकी फौजदारी कार्यविधि संहिता २०७४ को दफा ६७ (१) बमोजिम जिल्ला अदालतको आदेशलाई सदर गरेको उच्च अदालत पोखराले जनाएको छ । पल शाह नाबालिग बलात्कारको मुद्दामा पुर्पक्षका लागि तनहुँ कारागारमा थुनामा छन् ।

जिल्ला अदालत नवलपुर र तनहुँका आदेशविरुद्ध उच्च अदालतमा निवेदन दिएपनि उच्च अदालतले दुवै अदालतको आदेश सदर गरेको हो । बलात्कार आरोपमा उजुरी परेपछि गत फागुन ११ गते शाहले प्रहरी समक्ष आत्मसर्मपण गरेका थिए ।

उनीविरुद्ध तनहुँ र नवलपरासीमा उजुरी परेको थियो। दुबै अदालतले उनलाई पुर्पक्षमा पठाउने आदेश दिएका थिए ।