एजेन्सी । चीनको आर्थिक केन्द्र सांघाइमा दुई महिनायता जारी लकडाउन खुकुलो पारिएको छ । मंगलबार रातिदेखि अधिकांश मानिसहरुलाई हिँडडुल गर्न दिइएको छ ।

करिब अढाइ करोड जनसंख्या भएको सहरमा ६ लाख ५० हजार मानिस भने अझै घरभित्रै रहनेछन्। चीनले शून्य कोभिडको नीति लिएका कारण संक्रमितहरु या त अस्पताल या क्वारेन्टिनमा बस्नुपर्ने अवस्था छ।

नयाँ नियमअनुसार मानिसहरुले आफ्नो कम्पाउन्डबाट बाहिर निस्किन स्मार्टफोनमा स्वास्थ्य अवस्था सही रहेको हरियो कोड देखाउनुपर्ने हुन्छ ।

सार्वजनिक यातायात वा बैंकमा प्रवेश गर्न ७२ घण्टाभित्रको पीसीआर रिपोर्ट देखाउनु पर्छ । सिनेमा, जिम, म्युजियम भने बन्द रहनेछन्। धेरैजसो स्कुल पनि तत्काल खुल्ने छैन ।