काठमाडौं । बतास समूहले पशुपति धर्मशालामा होटल सञ्चालन गर्न नपाउने भएको छ । यसअघि भएको अन्तरकालीन आदेश काठमाडौं जिल्ला अदालतले बदर गरिदिएको हो ।

यसअघि जिल्ला अदालत काठमाडौंले होटेल सञ्चालन पाउने गरी दिएको अन्तरकालीन आदेश बदर भएसँगै बतास समूहले पशुपति धर्मशालामा होटल सञ्चालन गर्न नपाउने भएको हो ।

बुधबार न्यायाधीश विनोदकुमार पोखरेलको इजलासले गत चैत २५ गते बतास समूहको पक्षमा दिएको अन्तरकालीन आदेश बदर गरिदिएको हो ।

गत वर्ष चैत २५ गतेको आदेशमा जिल्ला अदालत काठमाडौंले निवेदकको व्यवसायमा गैरकानुनी रूपमा असर पर्नेगरी कुनै पनि कार्य नगर्न नगराउन भनेको थियो ।

तर, पशुपति विकास कोषको तर्फबाट उक्त आदेश खारेजीको माग गरेर निवेदन परेको थियो ।

सो निवेदनको सुनुवाई गर्दै न्यायाधीश विनोदकुमार पोखरेलको इजलासले कोष र बतास समूहबीचको करार भंग भइसकेकाले पुनः होटल सञ्चालन गर्न नहुने भन्दै अन्तरकालीन आदेश बदर गरिदिएको हो ।