काठमाडौँ । माओवादी केन्द्रका अध्यक्ष पुष्पकमल दाहाल प्रचण्डले स्थानीय तह निर्वाचनको परिणामलाई लिएर नेकपा (एमाले) का अध्यक्ष केपी शर्मा ओली खुसी नरहेको बताएका छन् ।

माओवादी केन्द्रबाट स्थानीय तहमा निर्वाचित प्रतिनिधि अभिमुखीकरण प्रशिक्षण कार्यक्रममा बोल्दै प्रचण्डले सार्वजनिक मन्तव्यमा जे भने पनि स्थानीय तहको निर्वाचनले एमालेलाई आगामी दिनमा सहज छैन भन्ने परेको बताएका हुन् ।

उनले भने, ‘मुखले जे भने पनि, भाषणमा जे भने पनि मन त रोएकै छ भन्ने थाहा पाइन्छ ।’चैनमा त छैनन् नि एमाले अहिले । एमाले अहिले चैनमा छ त ?  उनको प्रश्न थियो । ओलीले स्थानीय तह निर्वाचन प्रचारका क्रममा ‘माओवादी वैशाख ३० गतेपछि गुगलमा मात्रै भेटिने’ भनेर दिएको अभिव्यक्ति उल्लेख गर्दै स्थानीय तह निर्वाचनमा विजयी नेता र कार्यकर्तालाई भने, ‘अहिले त गुगलमा होइन, पूरा शक्तिका साथ उनीहरूका अगाडि खडा छ माओवादी ।’