काठमाडौं । प्रधानमन्त्री शेरबहादुर देउवाले निर्मला पन्तका हत्यारा कानुनी नियन्त्रणमा आउने बताएका छन् ।

चौथो राष्ट्रिय महिला अधिकार दिवसका अवसरमा आयोजित मूल समारोहको कार्यक्रममा उनले कञ्चनपुरकी १३ वर्षीया बालिका निर्मलाका हत्यारा कानुनी नियन्त्रणमा आउने विश्वास व्यक्त गरेका हुन् ।

प्रधानमन्त्री देउवाले हत्याका दोषी पक्राउ गर्न समय लागे पनि प्रहरीको अनुसन्धान जारी रहेकाले एक दिन हत्यारा कानुनी नियन्त्रणमा आउने बताए ।

महिला हिंसाका घटनामा सरकारले शून्य सहनशीलता अपनाउने र लैंगिक समानताका लागि संविधानले दिएको समावेशी समतामूलक हक, अधिकार कार्यान्वयनका लागि सक्दो पहल गर्ने उनको भनाई छ ।