काठमाडौं । प्रधानमन्त्री शेरबहादुर देउवाले लिपुलेक, कालापानी र लिम्पियाधुरालगायतका सीमा विवाद कूटनीतिक माध्यमबाट समाधान गर्ने बताएका छन् ।

सरकारको नीति तथा कार्यक्रमको छलफलमा उठेका प्रश्नको जवाफ दिँदै उनले लिपुलेकलगायतको भूभाग नेपालको भएको दाबी गरेका हुन् ।

उनले यसलाई कूटनीतिक माध्यमबाट समाधान गर्न सरकार प्रतिबद्ध रहेको बताए । एमाले अध्यक्ष केपी शर्मा ओलीले पटक–पटक लिपुलेकका बारेमा सरकारको जवाफ माग गरेका थिए । उनले प्रधानमन्त्री देउवालाई जवाफ दिन भनेका थिए ।

त्यस्तै प्रधानमन्त्री शेरबहादुर देउवाले नेपाल र आफू एक चीन नीतिमा अहिले पनि प्रतिबद्ध रहेको दाबी गरेका छन् । नीति तथा कार्यक्रममाथिको छलफलमा बोल्दै एमाले अध्यक्ष केपी शर्मा ओलीले चीनविरुद्धको गतिविधि भइरहेको र नेपालको असंलग्न परराष्ट्र नीतिविपरीत काम भइरहेको आरोप लगाएका थिए ।