काठमाडौं । रौतहटको राजदेवी नगरपालिका–४ मा रहेको श्री जनता सत्यनारायण माध्यमिक विद्यालय बसतपुरस्थित मतदान केन्द्रको मतपत्रमा मतदान अधिकृतको हस्ताक्षर नै नभएको पाइएको छ ।

मतदान अधिकृत हिराकान्त मिश्रले आफ्नो हस्ताक्षर नै नगरी मतदान गर्न लगाएका हुन् । आफ्ना दाजु पारस मिश्र र भतीज गोपाल मिश्रलाई मतदान स्थलमा राखेर मनपरि तरिकाले मतदान गराएको उनीमाथि आरोप छ ।

मतदान अधिकृतको हस्ताक्षर बिना नै मतपत्र वितरण गरि मतदान गर्न लगाएको सार्वजनिक भएपछि सो केन्द्रमा विवाद उत्पन्न भएको थियो । तर, मतदान अधिकृत मिश्रले उल्टै हस्ताक्षर बिना भएको मतदानलाई सदर गर्न मुख्य निर्वाचन अधिकृतको कार्यालयलाई अनुरोध गरेका छन् ।

क्रम संख्या ०१६८६०१ देखि ०१६८६५५ सम्मका केहि मतपत्रमा आफूले हस्ताक्षर नै नगरी मतदान गर्न लगाएको उनले स्वीकारेका छन् । उनले भूलवश त्यस्तो हुन गएको भन्दै सदर गर्न पत्र पठाएका हुन् ।

वडा नं ४ का वडाध्यक्षका उम्मेदवार उमाकान्त झालाई दिइएको मतपत्रमा समेत हस्ताक्षर नभएको पाइएपछि मतदान अधिकृतको लापरवाहीको खुलासा भएको थियो ।

मतदान अधिकृत मिश्रले आफ्ना दाजु पारस मिश्र र भतीज गोपाल मिश्रमार्फत निर्वाचन आचारसंहिताविपरीत कुनै निश्चित उम्मेदवारलाई फाइदा पुग्ने गरी काम गरेको र निर्वाचनको विश्वसनीयतामाथि प्रश्न चिन्ह खडा गरेको भन्दै अन्य उम्मेदवारका प्रतिनिधि र स्थानीयवासीले आवाज उठाएपछि
विभिन्न राजनीतिक दलका प्रतिनिधि एवं कर्मचारीहरूको रोहबरमा लिखित रुपमा गल्ती स्वीकार गरेका हुन् ।

विवादास्पद छविका मिश्रलाई आफ्नै पालिकाको आफ्नै वडाको मतदान स्थलमा मतदान अधिकृत बनाएर पठाउने काम भएको भन्दै गाउँलेहरूलाई शुरूमै मुख्य निर्वाचन अधिकृतको कार्यालयलाई सचेत गराएका थिए ।