कोलम्बो । श्रीलंकाका पूर्वप्रधानमन्त्री रनिल विक्रमासिङ्घे बिहीबार प्रधानमन्त्रीमा नियुक्त भएका छन् ।

यसअघि विक्रमासिङ्घे चार पटक देशको प्रधानमन्त्री भइसकेका छन् । अक्टोबर २०१८ मा तत्कालीन राष्ट्रपति मैत्रीपाला सिरिसेनाले उनलाई प्रधानमन्त्री पदबाट हटाएका थिए।

तर, त्यसको दुई महिनापछि सिरिसेनाले उनलाई प्रधानमन्त्रीमा पुनर्बहाली गरे ।

स्वतन्त्रता यताकै सबैभन्दा चर्को आर्थिक र राजनीतिक संकट झेल्दै आएका रनिल विक्रमासिंघे प्रधानमन्त्री पदमा फर्किएका हुन । देशका प्रमुख प्रतिपक्षी दलका नेता सजित प्रेमदासले पनि राष्ट्रपतिलाई पत्र लेखेर पद सम्हाल्ने इच्छा व्यक्त गरेका थिए ।

श्रीलंकामा आर्थिक संकटका कारण हिंसा बढ्दै जाँदा प्रधानमन्त्री महिन्दा राजापाक्षेको विरोधमा प्रदर्शन भइरहेपछि उनले राजीनामा दिएका थिए । विक्रमासिङ्घेलाई दूरदर्शी नीतिका साथ अर्थतन्त्र व्यवस्थापन गर्न सक्ने व्यक्तिको रूपमा व्यापक रूपमा मान्यता दिइन्छ।

विक्रमासिङ्घेलाई अन्तर्राष्ट्रिय सहयोगको नेतृत्व गर्न सक्ने श्रीलंकाली राजनीतिज्ञ मानिन्छ।  विक्रमासिङ्घेलाई इतिहासकै सबैभन्दा खराब आर्थिक अवस्थाको सामना गर्दै बिहीबार देशको नयाँ प्रधानमन्त्री नियुक्त गरिएको छ । २२५ सदस्यीय संसदमा रनिल विक्रमासिङ्घेको एउटा मात्र सिट छ ।

युनाइटेड नेशनल पार्टी (युएनपी) का नेता ७३ वर्षीय विक्रमासिङ्घेले बुधबार राष्ट्रपति गोटाबाया राजापाक्षेसँग कुराकानी गरेका थिए ।