जनकपुर । मुस्लिम आयोगका अध्यक्ष समिम मियाँ अन्सारी पक्राउ परेका छन्। निर्वाचनका समयमा पैसा बाँडेको अभियोगमा उनलाई धनुषाको जनकपुरधामबाट पक्राउ गरिएको हो।

सीता शरण होटेलको कोठा नम्बर ३ सय ५ बाट प्रहरीले उनलाई नियन्त्रणमा लिएको हो। २०७५ साल चैतमा तत्कालीन प्रधानमन्त्री केपी शर्मा ओलीले उनलाई आयोगको अध्यक्षमा नियुक्त गरेका थिए।

उनीविरुद्ध नागरिकता र शैक्षिक प्रमाणपत्र किर्ते गरेको उजुरी परेको थियो जसलाई संसदीय समितिले टुंगोमा पुर्‍याउन नसक्दा स्वतः उनको नियुक्ति सदर भएको थियो।

अन्सारीबारे थप अनुसन्धान भइरहेको प्रहरीले जनाएको छ ।