काठमाडौं । कपिलवस्तुको गोरुसिंगेमा रहेको समशेर दल गणमा गोली लागेर गम्भीर घाइते भएकी सैनिक जवानलाई थप उपचारको लागि काठमाडौं ल्याइएको छ ।

गणको भित्रि पोष्टमा कार्यरत झापा गौरादह-१ कि २४ वर्षीया कोपिला राजवंशीलाई गोली लागेको अवस्थामा बुधबार राती लुम्बिनी प्रादेशिक अस्पताल लगिएको थियो । बुटवलमा उपचार हुन नसकेपछि तत्कालै भैरहवास्थित युनिभर्सल कलेज अफ मेडिकल साईन्सेजमा लगिएको थियो।

त्यहाँ पनि उपचार सम्भव नभएपछि उनलाई थप उपचारको लागि नेपाली सेनाको हेलिकप्टरबाट काठमाडौं ल्याइएको बताइएको छ । बुधबार साँझ ७ बजेतिर भएको उक्त घटनापछि उनको छाती र पेटमा दुई वटा गोली लागेको छ ।

सैनिक स्रोतका अनुसार राजवंशी आफैंले गोली चलाएको दाबी गरिएको छ । घटना कसरी भएकोबारे अहिलेसम्म खुलाईएको छैन । अनुसन्धान कार्य भइरहेको बताइएको छ ।