काठमाडौं । नेपाली कांग्रेसका केन्द्री सदस्य प्रदीप पौडेलले ढल व्यबस्थापन, खोलानाला प्रदूषण, खनिज जन्य पदार्थको अन्धाधुन्ध प्रयोग, शुद्ध खानेपानी, वातारवरण लगायतका सवालहरुलाई चुनावी घोषणापत्र समेट्न आग्रह गरेका छन् ।

स्थानीय तह देखि नै सुन्दर गाउँ र सुन्दर शहर निर्माणका लागि आजका सामान्य तर प्रमुख समस्या यी सवालहरु रहेको भन्दै उनले प्रमुख ढंगले अध्ययन गरी यस्ता मुद्धाहरुलाई घोषणापत्र समेट्न आग्रह गरेका हुन् ।

व्यवस्थित र सुन्दर शहर निर्माण गर्न दिर्घकालिन योजना आजको आवश्यकता भएको उनले बताए । उनले काठमाडौँले भोगेको शहरीकरणको मोडेल अन्य शहर र शहर उन्मुख क्षेत्रहरुले नक्कल गरेको टिप्पणी समेत गरेका छन् ।

अस्तव्यस्त शहरीकरण र मानवीय जीवनका अति आवश्यक सेवा सुविधा शहर केन्द्रित हुँदा हाम्रा शहर अव्यवस्थित भीड जस्तै बन्न पुगेको उनले बताए । आफ्नो सभ्यताको सुन्दर इतिहास बोकेको काठमाडौं आज अस्तव्यस्त भएको छ,’उनले भने,’हुलका हुल सवारी र पट्यार लाग्दो सडक जाम, खोलामा मिसिएका अव्यस्थित ढल, अस्वस्थ खानेपानी, प्रदूषण, इनार र त्युबवेलमा पानी सुक्दै जाने देखि, सधैं उच्च ग्राफमा रहने प्रदुषण लगायतका सयौ समस्या झेलिरहेको दृष्टान्त हाम्रा सामु छर्लङ्ग छ ।’

‘फेरि, अरु सहरको विकास पनि यसरी नै हुने हो भने सिङ्गो देशलाई ठूलो समस्या आईपर्ने छ,’ उनले भने । त्यसैले आगामी स्थानीय तहको निर्वाचनमा हाम्रा प्रत्येक पार्टीहरुले हवाई सपना होईन, आम नागरिकले सरल जीवन जिउन दैनिक रूपमा भोगी रहेका समस्यालाई पहिलो प्रथामिकता दिन आवश्यक रहेको उनको भनाई छ ।