काठमाडौं । कार्यवाहक प्रधानमन्त्री बालकृष्ण खाँणले पेट्रोलियम पदार्थमा देखिएको समस्या तत्काल समाधान गर्न अधिकारीहरूलाई निर्देशन दिएका छन् ।

खाँणले आपूर्ति सचिव गणेश पाण्डे, नेपाल आयल निगमका कार्यवाहक महानिर्देशक वीरेन्द्र गोइत र नेपाल पेट्रोलियम डिलर्स एसोसिएसनका महासचिव विश्व अर्याललाई शनिबार टेलिफोन गरेर तत्काल समस्या समाधान गर्न निर्देशन दिएका हुन् ।

उनले अत्यावश्यक वस्तुमा समस्या देखिए सरकार नचाहँदा नचाहँदै कठोर हुनपर्ने चेतावनी दिएका थिए । व्यवसायीहरूले पेट्रलियम पदार्थ बेचे/नबेचेको अनुगमन गर्न खाँणबाट निर्देशन आएको र आफूहरूले जिल्ला प्रशासन कार्यालय काठमाडौंको सहयोगमा अनुगमन गरेको निगमका कार्यवाहक महानिर्देशक गोइतले जानकारी दिए ।

उनले कार्यवहाक प्रधानमन्त्रीको निर्देशनपछि उपत्यकाका २० बढी पम्पहरूमा अनुगमन गरेको जनाएका छन् । पेट्रोल ढुवानी तथा बिक्री वितरणमा देखिएको समस्या सुल्झाउन शनिबार साँझ ५ बजे आन्दोलनरत पक्षसँग वार्ता गर्ने तयारी भइरहेको पनि गोइतले जानकारी दिए ।

यता, डिलर्स एसोसिएसनका महासचिव अर्यालले पनि कार्यवाहक प्रधानमन्त्री खाँणले निर्देशन दिएको बताउँदै आफ्ना माग सामान्य भएकाले वार्तामार्फत सहमति गर्न तयार रहेको बताएका छन् ।

व्यवसायी र डिजेल ढुवानीकर्ताहरूले पेट्रोलिय पदार्थको मूल्यबृद्धिसँगै कमिसन पनि प्रतिशतका आधारमा बढाइनु पर्ने र डिजेल पेट्रोल बोक्ने ट्यांकरको भाडा बढाइनु पर्नेलगायतका माग राखेर शुक्रबारदेखि पेट्रोलियम पदार्थ बिक्री ठप्प पारेका छन् ।

नेपाल आयल निगमसँग विभिन्न माग राख्दै व्यवसायीहरूले पेट्रोलियम पदार्थको ढुवानी देशभर ठप्प बनाएपछि देशभर थप अभाव भएको हो।

शुक्रबार र शनिबार नेपाली सेना, पुलिस र सशस्त्रको पम्पहरूमा सवारीको बाक्लो लाइन थियो ।