काठमाडौं । पुर्पक्षका लागि थुनामा रहेका अभिनेता पल शाह जिल्ला अदालत तनहुँको थुनछेक आदेशविरुद्ध पुनरावेदनका लागि आज उच्च अदालत पोखरा जाने भएका छन् ।

जिल्ला अदालतको आदेश चित्त बुझ्दो नभएकाले उनले आज उच्च अदालत पोखरामा पुनरावेदन दिन लागेका हुन् ।

पलका पक्षका कानुन व्यवसायी वरिष्ठ अधिवक्ता कमलामोहन वाग्लेले सोमबार नै उच्च अदालत जाने तयारी रहेको जानकारी दिए । तर समय अभावका कारण सोमबार जान नसकेको उनले बताए । आज उच्च अदालत पोखरा पुगेर पुनरावेदन निवेदन दिन लागेको उनको भनाई छ ।

पललाई तारेख वा धरौटीमा छाडेर मुद्दा पुर्पक्ष गरियोस् भनेर माग राखे पनि अदालतले थुनामा पठाएकाले पुनरावेदन दिन लागेको उनले जानकारी दिए ।

नाबालिग गायिकालाई जबरजस्तीकरणी गरेको मुद्दामा नायक पल शाह जिल्ला अदालत तनहुँलेचैत्र १० गते पुर्पक्षका लागि थुनामा पठाएको थियो ।