काठमाडौं ।नेकपा एमालेका अध्यक्ष केपी शर्मा ओली र चिनियाँ विदेशीमन्त्री वाङ यीबीच शिष्टाचार भेटवार्ता भएको छ ।

आइतबार बिहान ओली र वाङबीच काठमाडौंको मेरियट होटेलमा भेटवार्ता भएको हो । भेटमा दुईपक्षीय आपसी हितका विविध विषयमा विचार–विमर्श भएको बताइएको छ ।

भेटमा एमालेका वरिष्ठ उपाध्यक्ष ईश्वर पोखरेल, महासचिव शंकर पोखरेललगायत नेताहरूको पनि सहभागिता रहेको थियो । वाङले आजै सत्तासाझेदार दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’सित पनि भेटवार्ता गर्नेछन् ।

यसअघि आजै चिनियाँ विदेशीमन्त्री वाङले राष्ट्रपति विद्यादेवी भण्डारीसँग पनि शिष्टाचार भेट गरेका थिए । तीनदिने नेपाल भ्रमणका क्रममा गएको शुक्रबार नेपाल आएका वाङ आजै स्वदेश फर्कने छन् ।