काठमाडौं । तीन दिने नेपाल भ्रमणमा रहेका चिनियाँ विदेशमन्त्री वाङ यीले भ्रमणको अन्तिम दिन आज (आइतवार) महत्वपूर्ण भेटवार्ता गर्दैछन् ।

जसअनुसार वाङले आज राष्ट्रपति विद्यादेवी भण्डारीलाई भेट्दै छन् । बिहान ९:३० बजे शीतल निवास पुगेर राष्ट्रपति भण्डारीसँग भेटवार्ता गर्ने उनको कार्यसूची छ ।

यसलगत्तै उनले नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’सँग छुट्टाछुट्टै भेटवार्ता गर्नेछन् ।

होटल मेरियटमा ओली र प्रचण्डसँग छुट्टाछुट्टै भेटवार्ता गर्ने वाङको कार्यसूची छ । नेपाल भ्रमण सकेर वाङ यी आइतवार नै स्वदेश फर्कने कार्यक्रम रहेको छ ।