काठमाडौं । प्रधानमन्त्री शेरबहादुर देउवासित चीनका विदेशमन्त्री वाङ यीले शिष्टाचार भेटवार्ता गरेका छन् । शनिबार प्रधानमन्त्रीको सरकारी निवास बालुवाटार पुगी उनले प्रधानमन्त्रीसित भेटवार्ता गरेका हुन् ।

भेटका क्रममा दुई देशबीच आपसी हितका विविध विषयमा छलफल भएको बताइएको छ । त्यसक्रममा परराष्ट्रमन्त्री डा. नारायण खड्कालगायत अधिकारीको उपस्थिति थियो ।

यस्तै सिंहदरबारमा प्रधानमन्त्री तथा मन्त्रिपरिषद्को कार्यालयमा विदेशमन्त्री वाङ र परराष्ट्रमन्त्री खड्काबीच भेटवार्ता भएको थियो । पछि दुई देशका प्रतिनिधिमण्डलबीच द्विपक्षीय वार्ता भएको थियो ।

भेटमा नेपाल र चीन बीच विभिन्न नौ वटा समझदारी पत्रमा हस्ताक्षर भएको छ । विदेशमन्त्री वाङ नेतृत्वको प्रतिनिधिमण्डल तीनदिने भ्रमणका लागि शुक्रबार नेपाल आएको हो ।