काठमाडौं । महानगरीय प्रहरी परिसर काठमाडौंले आफ्नै श्रीमतीलाई आगो लगाई जलाउन खोज्ने श्रीमानलाई पक्राउ गरेको छ । चैत ११ गते राती अन्दाजी ९ः१० बजेको समयमा बुढानिलकण्ठ नगरपालिका–१० कपन आकाशेधारा नजिकै रहेको टिनले छाएको एक तले टहराको कोठामा श्रीमतीलाई जलाउन खोज्ने श्रीमान पक्राउ परेका हुन् ।
पक्राउ पर्नेमा लाहान नगरपालिका–७, सिरहा स्थाई घर भएका ४२ वर्षिय प्रबिन चौधरी रहेका छन् । प्रहरीका अनुसार चौधरीले आफ्नै ३० वर्षकी श्रीमती अस्मिता चौधरीलाई सुतिरहेको अवस्थामा शरीरमा तारपिन तेल खन्याई आगो लगाई दिएका थिए ।

तर, उनको कोठा नजिकै बस्ने महानगरीय प्रहरी पहरा गण सामाखुसीबाट मन्त्री निवास हरिहर भवन पुल्चोकमा कार्यरत असई सम्योग राईले थाहा पाई उक्त स्थानमा गई ढोको फोडी उद्दार गरेका थिए । सई राईले महानगरीय प्रहरी प्रभाग कपनबाट खटिइको प्रहरी टोली र स्थानिय समेतको सहयोगमा उद्दार गरेको पनि परिसरले जनाएको छ ।

घाईते चौधरीलाई उपचारको लागि साँखु स्थित सुष्मा मेमोरियल अस्पतालमा लगी उपचार भई रहेको प्रहरीले जनाएको छ । प्रहरीका अनुसार घाईतेको शरीरको बिभिन्न भागमा पोलेको छ । घटनामा संलग्न प्रबिन चौधरीलाई नियन्त्रणमा लिई महानगरीय प्रहरी बृत्त बौद्धबाट थप अनुसन्धान भई रहेको प्रहरीले जनाएको छ ।