काठमाडौं । एक नाबालिकामाथि करणी गरेको आरोपमा अभिनेता पल शाहविरुद्ध आज तनहुँ जिल्ला अदालतमा जबर्जस्ती करणीको मुद्दा दर्ता गरिएको छ ।

नाबालिग गायिकाको तर्फबाट परेको जाहेरीका आधारमा शाहमाथि तनहुँ जिल्ला अदालतमा दोस्रो मुद्दा दायर भएको हो । यसअघि शाहविरुद्ध पूर्वी नवलपरासी जिल्ला अदालतमा बलात्कारको अभियोग पत्र दर्ता भइसकेको छ ।

तनहुँ जिल्ला सरकारी वकिल कार्यालयले अदालतमा अभियोग पत्र दर्ता गराएको हो । अभियोग पत्रमा बलात्कारको घटना हुँदा पीडितको उमेर १६ वर्षभन्दा कम भएकाले कानून अनुसार १२ देखि १४ वर्षको जेल सजाय माग गरिएको छ । यस्तै, शाहका सहयोगी कृष्ण जोशीलाई पल शाहको भन्दा आधा जेल सजायको माग अभियोग पत्रमा गरिएको छ ।

शाहविरुद्ध यसअघि पीडित भनिएकी नाबालिगले दुवै जिल्लामा शाहविरुद्ध जाहेरी दिएकी थिइन् । तनहुँ जिल्ला अदालतमा थुनछेकको बहसपछि मात्र शाहको पूर्वी नवलपरासीको मुद्धाको प्रक्रिया अगाडि बढाउने तयारी भइरहेको छ ।

पूर्वी नवलपरासी जिल्ला सरकारी वकिल कार्यालयले पनि शाहविरुद्ध १२ देखि १४ वर्षसम्म कैद सजाय माग गर्दै अभियोग दर्ता गरेको छ ।