काठमाडौं । जिल्ला अदालत तनहुँले नाबालिगमाथि बलात्कारको अभियोगमा प्रहरी हिरासतमा रहेका अभिनेता पल शाहलाई थप ५ दिन हिरासतमा राख्न अनुमति दिएको छ ।

जिल्ला अदालत तनहुँ स्रोतका अनुसार शुक्रबार अभिनेता शाहमाथि अनुसन्धानका लागि अदालतले थप ५ दिनको समय दिएको हो । यसअघि तनहुँ अदालतले दोस्रोपटक फागुन २२ गते १२ दिनको समय दिएर शाहमाथि अनुसन्धान गर्न जिल्ला प्रहरी कार्यालय तनहुँलाई अनुमति दिएको थियो ।

अभिनेता शाहविरुद्ध एक नाबालिक गायिकालाई बलात्कार गरेको आरोपमा नवलपुर जिल्ला अदालतमा बिहीबार मुद्दा दर्ता भएको छ । जिल्ला सरकारी वकिलको कार्यालयले प्रहरीको अनुसन्धानका आधारमा पल शाहमाथि बिहेको प्रलोभन देखाएर नाबालिकामाथि जबरजस्ती करणी गरेको अभियोगसहित मुद्दा दायर गरेको हो ।

जिल्ला सरकारी वकिलको कार्यालय नवलपुरले जिल्ला अदालत नवलपुरमा दायर गरेको अभियोगपत्रमा शाहविरुद्ध मुलुकी अपराध संहिता २०७४ को दफा २१९ को १ र २ अनुसारको कसूर गरेको दावी गर्दै सोही दफाको ३ को (ग) अनुसार सजाय माग गरिएको छ । उक्त दफा अनुसार १४ देखि १६ वर्षसम्मकी बालिका बलात्कार गरेकामा १२ देखि १४ वर्ष सजाय हुने उल्लेख छ ।