ओखलढुंगा । अख्तियार दुरुपयोग अनुसन्धान आयोगका आयुक्त जयबहादुर चन्दले सबैभन्दा बढी भ्रष्टाचार स्थानीय तहमा हुने गरेको बताएका छन् । सोही कारण आयोगमा बढी उजुरी दर्ता भएको चन्दको भनाइ छ ।

सोमबार ओखलढुंगा सदरमुकाममा आयोजित ‘भ्रष्टाचार नियन्त्रण तथा सुशासन प्रवर्द्धन’ विषयक अन्तरक्रियामा बोल्दै आयुक्त चन्दले यस्तो बताएका हुन् ।

‘संख्या पनि स्थानीय तहको बढी भयो । भ्रष्टाचार पनि स्थानीय तहमै बढी भयो,’ आयुक्त चन्दले भने, ‘किनभने योजनाको संख्या पनि टुक्रेटाक्रे गरेर धेरै नै छ । यसमा सुधार आवश्यक छ ।’

अख्तियार दुरुपयोग अनुसन्धान आयोगको महोत्तरीस्थित बर्दिबासमा दुई आर्थिक वर्षमा दर्ता भएका ९ जिल्लाका उजुरीमध्ये सबैभन्दा बढी १ हजार १ सय ५७ वटा मुद्दा स्थानीय तहको दर्ता भएका छन् ।

संघअन्तर्गतका योजनाको ५ सय २६ वटा र प्रदेश अन्तर्गतका ८६ वटामात्र उजुरी दर्ता भएको कार्यालये जनाएको छ । चालु आर्थिक वर्षमा अख्तियारमा ओखलढुंगाको स्थानीय तहका १६ वटा उजुरी दर्ता भएको आयोगले जनाएको छ ।