काठमाडौँ । महानगरीय अपराध महाशाखाले काठमाडौंको कालिमाटी एरियाबाट करोडौंको हुण्डी कारोबारीहरुलाई पक्राउ गरेको छ ।

पक्राउ पर्नेहरुमा भारत फर्मेन्जगन्ज घर भइ काठमाडौं ताहचल बस्ने ३२ वर्षीय अमित अग्रवाल र काठमाडौँ कीर्तिपुरका २४ बर्षीय बिक्की खड्की रहेका छन्।

महाशाखाका अनुसार पक्राउ पर्नेमध्यका अग्रवाल काठमाडौंको असनस्थित मख्खन गल्लीमा बिमला इन्टरनेशनल प्रा.लि.का संचालक समेत हुन् । अग्रवाल र खड्कीलाई अवैध हुण्डी करोबारमा संलग्न भएको सूचनाका आधारमा आइतबार साँझ पक्राउ गरिएको हो ।

उनीहरुको साथबाट १ करोड ५० लाख नगदसहित ल्यापटप, मोबाइल र बिभिन्न कागजपत्र समेत बरामद गरिएको महाशाखाले जनाएको छ ।

उनीहरुलाई थप अनुसन्धान तथा कारबाहीको लागि राजश्व अनुसन्धान बिभाग, हरिहरभवन, ललितपुर पठाइएको महाशाखाको भनाइ छ ।