जोमसोम । मुस्ताङको थासाङ गाउँपालिका-२ मानापाथी हिमालको फेंदमा शनिबार बिहान करिव ४ बजे भीषण हिउँ पहिरो गएको छ। हिउँपहिरोले पुरिएर पानापाथी हिमालको फेदनजिक खर्कको गोठमा रहेका १५ वटा चौरी मरेको जनाइएको छ।

थासाङ-२ नाउँरिकोटकी स्थानीय शुशिला गौचन र उनका भाइ नरप्रसाद गौचनको गोठमा रहेका ३९ वटा चौरीमध्ये १५ वटा चौरी हिउँपहिरोमा पुरिएर मरेको हो ।

उनका अनुसार कुल ३९ वटा चौरीमध्ये १४ वटा चौरी जिउँदो भेटिएको र १५ वटा चौरी हिउँपहिरोमा पुरिएर मरेका छन् भने १० वटा चौरी अझै फेला पर्न नसकेको बताइएको छ ।

गोठमा चौरी हेर्ने गोठाला त्यहा नभएको अवस्थामा हिउँपहिरो गएको चौरी धनी शुशिला गौचनले बताइन्। हिउपहिरोले चौरी गोठ पुरै पुरिएको र आफ्नो चौरी गोठमा लाखौंका क्षति पुगेको उनले बताइन्।