काठमाडौं । स्थानीय तह निर्वाचनका लागि नेपाली कांग्रेसले निर्वाचन आयोगमा दल दर्ता गराएको छ ।

शुक्रबार कांग्रेस उपसभापति धनराज गुरुङ नेतृत्वको टोलीले स्थानीय तह निर्वाचन प्रयोजनका लागि आयोगमा दल दर्ताका लागि निवेदन दिएको हो ।

गुरुङले आयोगमा दल दर्ता कार्य सम्पन्न भएको जानकारी दिए । दल दर्तापछि कांग्रेसको टोलीले प्रमुख निर्वाचन आयुक्त दिनेश थपलियासँग निर्वाचनको तयारी सम्बन्धी छलफल गरेको थियो ।

यस्तै आज प्रमुख प्रतिपक्ष दल नेकपा एमालेले स्थानीय तह निर्वाचन प्रयोजनका लागि निर्वाचन आयोगमा दल दर्ता गराएको छ । एमालेका महासचिव शङ्कर पोखरेल नेतृत्वको टोलीले आज निर्वाचन आयोगमा पुगेर स्थानीय तह निर्वाचन प्रयोजनका लागि दल दर्ता गराएको थियो ।