काठमाडौं । प्रधानमन्त्री शेरबहादुर देउवाले भू-राजनीतिक ‌संवेदनशीलताका कारण उत्पन्न हुने सम्भावित सुरक्षा चुनौतीतर्फ सचेत रहन नेपाली सेनालाई निर्देशन दिएका छन्।

बुधबार जंगी अड्डामा कमाण्ड सेनापति समन्वयात्मक बैठकको शुभारम्भ गर्दै प्रधानमन्त्री देउवाले भू-राजनीतिक अवस्थितिका कारण अन्तर्राष्ट्रिय र क्षेत्रीय सुरक्षामा असर पार्न सक्ने भन्दै त्यसतर्फ सचेत हुन सेनालाई निर्देशन दिएका हुन्।

पछिल्लो समय अन्तर्राष्ट्रिय र क्षेत्रीय सुरक्षामा आएको परिवर्तनले मुलुकको राजनीतिक, आर्थिक र समग्र सुरक्षामा असर पार्न सक्ने प्रधानमन्त्री देउवाको भनाइ छ।

कार्यक्रममा प्रधानसेनापति प्रभुराम शर्माले जस्तोसुकै परिस्थिति आएपनि जिम्मेवारी निर्वाह गर्न नेपाली सेना तयार रहेको बताए । प्रधानसेनापति शर्माले सरकारका आदेशहरु अक्षरस पालना गर्न नेपाली सेना कटिवद्ध रहेको प्रधानमन्त्रीलाई विश्वास दिए ।

दुईदिनसम्म चल्ने बैठकमा प्रधान सेनापति, रक्षा सचिव, जंगी अड्डाका कमाण्ड सेनापतिहरुलगायत विभिन्न विभाग, महानिर्देशनालय, कोर तथा निर्देशनालयका प्रमुखहरु तथा उपत्यका भित्र रहेका बाहिनी अड्डाका बाहिनीपतिहरु उपस्थित थिए।