काठमाडौँ । महानगरीय अपराध महाशाखाले बैंकिङ कसूर मुद्दाका फरार रहेका एक प्रतिवादीलाई पक्राउ गरेको छ ।

पक्राउ पर्नेमा धादिङ जिल्ला साविक चैनपुर-०१ घर भइ काठमाडौँ महानगरपालिका-१६ बस्ने ४३ बर्षीय रमेश बहादुर पाठक रहेका छन् ।

महाशाखाका अनुसार पाठकलाई बैंकिङ कसुर मुद्दा गत मङ्सिर २१ गते उच्च अदालत पाटनको फैसलाले ७ लाख जरिबाना तोकेको थियो । अदालतको फैसलापछि फरार रहेका पाठकलाई आज दिउँसो सोह्रखुट्टबाट पक्राउ गरिएको महाशाखाले जनाएको छ।

पक्राउ परेका पाठक गिरीभूमि रियल स्टेट प्रालि (GRIGABHUMI REAL STATE PVT.LTD ) का संचालक समेत हुन्।

पाठकलाई  फैसला कार्यान्वयनका लागि आजै जिल्ला अदालत काठमाडौँमा पेस गरिएको महाशाखाले जनाएको छ ।