काठमाडौं । प्रहरीको साइबर ब्यूरो भोटाहिटीले प्रविधिको दुरुपयोगबाट हुने ठगीबाट बच्नका लागि सामाजिक सञ्जालमा आउने भ्रामक कुरामा विश्वास नगरी सतर्कता अपनाउन अनुरोध गरेको छ ।

विगत केही समयदेखि केही व्यक्ति तथा आपराधिक समूहले प्रविधिको दुरुपयोग गर्दै सामाजिक सञ्जालमार्फत् चिठ्ठा परेको भन्दै चिठ्ठा बापतको रकम पाउनका लागि कर चुक्ता गर्न यति रकम चाहिने भन्दै बैङ्क तथा अनलाईनमार्फत् पैसा जम्मा गर्न लगाई ठगी गर्ने प्रवृति बढेपछि यस्ता भ्रामक कुरामा विश्वास नगर्न अनुरोध गरेको हो ।

सामाजिक सञ्जाल भाईबर, वाट्स्‌एप, इमोलगायतका विभिन्न सामाजिक एपहरूमार्फत् भिडियो, अडियो तथा टेक्स्ट मेसेज गरेर प्रलोभनमा पार्दै ठगी हुने गरेको पाइएको ब्यूरोले जनाएको छ ।

साथै, विद्युतीय कारोबार गर्दा हुने जोखिमका बारेमा जारी हुने राष्ट्र बै‌कको भुक्तानी प्रणाली विभाग र विदेशी विनिमय व्यवस्थापन विभागको सूचनाबाट समेत जानकारी लिन आग्रह गरेको छ ।