काठमाडौं । ओमानमा जारी चार देश सम्मिलित टी-२० अन्तर्राष्ट्रिय क्रिकेट शृंखलाअन्तर्गत आयरल्यान्डले नेपाललाई १२८ रनको लक्ष्य दिएको छ।

सोमबारको खेलमा टस हारेर सुरुवाती ब्याटिङ गरेको आयरल्यान्डले ९ विकेटको क्षतिमा मात्र १२७ रनको योगफल तयार गर्यो । आयरल्याण्डलाई सस्तैमा समेट्न नेपालका लागि ब्याटिङ अलराउन्डर दीपेन्द्रसिंह ऐरीले शानदार प्रदर्शन गरे।

दीपेन्द्र एक्लैले चार विकेट लिए । उनले ४ ओभरमा मात्र २१ रन खर्चिए । त्यस्तै, अविनाश बोहराले दुई विकेट लिए।

त्यसअघि मिडियम पेस बलरहरू जितेन्द्र मुखिया ,कमलसिंह ऐरी र कप्तान सन्दिप लामिछानेले समान एक/एक विकेट लिए। सन्दीपको अन्तराष्ट्रिय क्रिकेटमा ५० औं विकेट हो।

यता, आइरल्याण्डका लागि जर्ज डक्रेलले सर्वाधिक २८ रनको योगदान दिए ।