काठमाडौँ । बिहीबारदेखि परेको अविरल हिउँका कारण सोलुखुम्बुको नाम्चे बजार सेताम्मे भएको छ । नेपालकै पर्यटकीय क्षेत्रको रुपमा रहेको उक्त स्थानमा बाक्लो हिमपात भएको नाम्चेबाट टोमी गुस्टाफसनले अनलाइन नेपाललाई जानकारी दिए ।

हिउँका कारण नाम्चे क्षेत्रका सबै होटल तथा रेस्टुराहरुको छाना पुरिएका छन् । सगरमाथाको द्वार भनेर चिनिने नाम्चेमा यो महिना पहिलो पटक हिउँ परेको हो।

टोमीका अनुसार बाक्लो हिउँका कारण सगरमाथा क्षेत्रमा आएका पर्यटकहरुलाई सास्ती भएको छ भने मौसम नखुल्दा मनमोहक हिमालहरु बादलभित्र लुक्न बाध्य भएका छन्।

यस्तै, हिउँका कारण लुक्ला विमानस्थल पनि बन्द भएको छ । लुक्लादेखि नाम्चेसम्म बाटोभर हिउँ नै हिउँ भएको छ। हिमपातका कारण सयौं पर्यटकहरु लुक्लामै रोकिएका छन्।