काठमाडौँ । छिमेकी मुलुक भारत सरकारको अनुदानमा महाकाली नदीमा गाडी गुड्ने पुल निर्माण हुने भएको छ।

मंगलबार पुल निर्माणका लागि दुई देशबीच सम्झौता पत्रमा हस्ताक्षर गरिएको छ । पत्रमा भारतको धार्चुला र नेपालको दार्चुला जोड्ने गरी गाडी गुड्ने पुलको निर्माणका लागि हस्ताक्षर भएको भारतीय राजदूतावासले जनाएको छ ।

दूतावासका अनुसार सम्झौतामा नेपालका लागि भारतीय राजदूत विनय मोहन क्वात्रा र नेपाल सरकार भौतिक पूर्वाधार तथा यातायात मन्त्रालयका सचिव रविन्द्रनाथ श्रेष्ठले मन्त्री श्रीमती रेणु कुमारी यादवको उपस्थितिमा सो सम्झौता पत्रमा हस्ताक्षर गरेका हुन्।

यस परियोजनाले नेपालको सुदुरपश्चिम प्रदेश र भारतको उत्तराखण्ड राज्यबीचको सीमापार कनेक्टिभिटिलाई सुदृढ बनाउनुका साथै दुवै तर्फको सीमा समुदायबीच रहेको जनता–जनताबीचको सम्पर्कलाई थप मजबुत बनाउने दुवै देशको विश्वास छ ।

परियोजना चाँडै सुरु गर्ने योजना रहेको दूतावासको भनाइ छ।