काठमाडौं । गौर हत्याकाण्ड दोहोर्‍याउने धम्की दिएकी भौतिक पूर्वाधार तथा यातायात मन्त्री रेणुकुमारी यादवलाई पदबाट बर्खास्तीको माग गर्दै सत्ता गठबन्धनका अध्यक्षहरुलाई नागरिक अगुवाहरुले पत्र लेखेका छन् ।

नागरिक अगुवाहरुले प्रधानमन्त्री शेरबहादुर देउवासहित सत्तारुढ गठबन्धनका दलका पाँच वटा अध्यक्षलाई पत्र पठाएका हुन् । माघ ५ गते यादवले हिंसालाई प्रोत्साहन गर्ने र समाजमा अशान्ति फैलाउने अभिव्यक्ति दिएकाले उनलाई बर्खास्तीको माग गर्दै पाँचै दलका अध्यक्षलाई पार्टी कार्यालयमा पत्र लेखेर दर्ता गराएका हुन् ।

नागरिक अगुवा कनकमणि दीक्षित, डा. केदानरनरसिंह केसी, चरण प्रसाईं, गणेशकुमार मण्डल, सुशील प्याकुरेल, तारानाथ दाहाल, इन्द्र अर्याल र महामुनीश्वर आचार्यले गठबन्धनका ५ दलका अध्यक्षलाई पत्र लेखेका हुन् ।

सरकारले अझै उनको बर्खास्ती नगरेकोले माघ ७ मा वक्तब्य निकाल्ने आफूहरुले वर्तमान गठबन्धनका अध्यक्षहरुलाई छुट्टाछुट्टै पत्र लेखि कार्यालयमा दर्ता गरेको नागरिक अगुवा कनकमणि दीक्षितले जानकारी दिए ।

माघ ५को मन्त्री रेणु यादवको हिंसा प्रोत्साहन गर्ने, सामाजमा अशान्ति फैलाउने अभिव्यक्तिमा सरकारले अझै उहाँको बर्खास्ती नगरेकोले माघ ७मा वक्तब्य निकाल्ने हामी ८ नागरीकले वर्तमान गठबंधनका ५ दलका अध्यक्षलाई छुट्टाछुट्टै पत्र लेखि कार्यालयमा दर्ता गरेका छौँ।
सार्वजनिक जानकारीका लागि। pic.twitter.com/FLgCIKZGdq

— Kanak Mani Dixit (@KanakManiDixit) January 31, 2022