काठमाडौं । ललितपुरको सुनाकोठीबाट चोरिएको बालकुमारी माईको मूर्ति खोजीका लागि प्रहरी नायव निरीक्षक दीपक भारतीको संयोजकत्वमा पाँच सदस्यीय अनुसन्धान टोली गठन गरिएको छ ।

माईको मूर्ति खोजीका लागि उक्त अनुसन्धान टोली गठन गरिएको प्रहरी परिसर ललितपुरका प्रहरी उपरीक्षक सिद्धिविक्रम शाहले जानकारी दिए ।

उनले भने, ‘प्राविधिक सहित अनुसन्धानका लागि टोली गठन गरेका छौं, अनुसन्धानका टुल्सहरु प्रयोग गरेर खोजी सुरु गरिसकेका छौं ।’ ललितपुर महानगरको वडा-२७ मा रहेको मन्दिरबाट बालकुमारीमाईको मूर्ति आइतबार चोरी भएको थियो ।

चोरीमा संलग्नले चारवटा ताल्चा काटेर मन्दिरभित्र प्रवेश गरी मूर्ति चोरेको प्रहरीले बताएको छ । प्रदेश सांसद राजकाजी महर्जनले कल ट्रेसिङ्ग लगायत सम्पूर्ण अत्याधुनिक प्रविधि प्रयोग गरेर अनुसन्धानलाई चुस्त र प्रभावकारी बनाउनुपर्ने बताए ।