काठमाडौँ । भारतको छत्तीसगढमा मंगलबार भएको छुट्टाछुट्टै भिडन्तका घटनामा पाँच माओवादी मारिएका छन् । स्थानीय प्रहरीका अनुसार मुठभेडमा तेलंगानाका एक शीर्ष माओवादी नेता समेत रहेका छन् ।

बीबीसीका अनुसार उक्त क्षेत्रमा माओवादीहरूविरुद्धको संयुक्त अभियान निरन्तर चलिरहेको छ । आज पनि यस्तै अपरेशनमा दुईवटा भिडन्तका घटना भएका थिए। जसमा अहिलेसम्म पाँच माओवादीको शव फेला परेको उल्लेख छ।

रिपोर्टका अनुसार तेलंगाना राज्य कमिटीका वरिष्ठ माओवादी नेता सुधाकर र वेंकटपुरमसहित करिब ४०-५० हतियारधारी माओवादीको उपस्थिति तेलंगानाको सीमावर्ती क्षेत्र पेरुर, इल्मिदी र उसूर प्रहरी चौकी अन्तर्गतको पहाडी क्षेत्रमा भएको बताइएको छ ।

यस भिडन्तमा ग्रेहाउन्ड स्क्वाडका एक जवान पनि गम्भीर घाइते भएका छन्, जसलाई उपचारका लागि वारंगल अस्पतालमा भर्ना गरिएको छ।

प्रहरीका अनुसार दोस्रो भिडन्त दन्तेवाडा र सुकमा जिल्लाको सीमावर्ती क्षेत्र मर्जुम र प्रतापगिरीको जंगलमा भएको हो । यस भिडन्तमा एक संदिग्ध महिला माओवादी मारिएको प्रहरीले दावी गरेको छ ।