हेटौँडा । जिल्ला प्रहरी कार्यालय मकवानपुरले १८३ किलो लागूऔषध गाँजा बोकेको गाडीसहित एक जनालाई पक्राउ गरेको छ।

पक्राउ पर्नेमा गाडी चालक मकवानपुर थाहा न.पा. २ का ३० बर्षीय रामचन्द्र सिंतान रहेका छन्।

सोमबार साँझ ६ बजे मकवानपुर भिमफेदी गा.पा. वडा नं. २ भैंसेस्थित चेक पोष्टमा सवारी साधन चेकजाँच गर्ने क्रममा पालुङतर्फबाट हेटौडा आउँदै गर्दा रामचन्द्रसहित उक्त परिमाणको लागू औषध फेला परेको प्रहरीले जनाएको छ।

प्रदेश ३-०१-००२२ च ३५५६ नं. को पिकअप गाडिलाई प्रहरीले रोकेर चेक गर्नेक्रममा गाडीमा लुकाइएको अवस्थामा गाँजा भेटिएको प्रहरीको भनाइ छ।

पक्राउ परेका उनीमाथि प्रहरीले थप अनुसन्धान अघि बढाएको जनाएको छ।