धनगढी । जिल्ला प्रहरी कार्यालय कैलालीले घोडाघोडी नगरपालिकाकी ७७ बर्षिया एक बृद्धामाथिको बलात्कार प्रकरणमा वडा सदस्यसहित पाँच जनालाई पक्राउ गरेको छ ।

पक्राउ पर्नेहरुमा सोही नगरपालिका-४ का ३० वर्षीय प्रकाश सुवेदी, वडा सदस्य लक्ष्मीरुद्र न्यौपाने, शिक्षक होमप्रसाद सुवेदी, पूर्ववडा सचिव यज्ञराज आचार्य र स्थानीय राजु भट्टराई रहेका छन्।

प्रहरीका अनुसार गत मंसिर १५ गते स्थानीय ७७ वर्षीया वृद्धामाथि बलात्कार भएको थियो । उनका छोराले सोही दिन प्रहरीमा उजुरी दिन खोज्दा स्थानीय जनप्रतिनिधिले मिलापत्र गराएका थिए । तर आर्थिक लेनदेनमा कुरा नमिलेपछि घटना बाहिरिएको अनुसन्धानमा देखिएको छ।

प्रहरी स्रोतका अनुसार पीडकले पीडित पक्षलाई नगद तीन लाख रुपैयाँ दिने सहमति गरेर मिलापत्र गराएको थिए । तर सहमति बमोजिम पूरै रकम नदिइएपछि पीडित पक्षले प्रहरीमा उजुरी दिएको छ ।

सोही उजुरीका आधारमा प्रहरीले उनीहरुलाई पक्राउ गरेर अनुसन्धान सुरु गरेको बताएको छ ।