काठमाडौं । शहीद स्मारक ए डिभिजन लिगअन्तर्गत आज दुई ठूला क्लब मनाङ मर्स्याङ्दी क्लब र मछिन्द्र फुटबल क्लब भिड्दैछन् ।

मनाङ सर्वाधिक ८ पटकको लिग विजेता टिम हो । जारी सिजन पाँचौ चरणसम्मको खेलपछि मनाङ शीर्ष स्थानमा छ । छैटौं चरणको खेल सुरु भइसकेको छ। उता साविक विजेता मछिन्द्र दोस्रो स्थानमा छ ।

मनाङले ५ मध्ये चार जित र एक बराबरी नतिजाबाट १३ अंक जोडेको छ । मछिन्द्रले भने तीन खेल जित्दा दुई खेल बराबरीमा टुङ्गिएको थियो ।

दशरथ रंगशालामा दुई खेल हुने यी दुई टीमबीचको खेल साँझ पौने ५ बजे हुँदैछ । दुबै टोलीको लक्ष्य खेल जित्दै तीन अंक जोड्ने हुनेछ ।

यस्तै, आज नै १ बजे हुने खेलमा हिमालयन शेर्पा क्लब र च्यासल युथ क्लबबीच प्रतिस्पर्धा हुनेछ । हिमालयन ५ खेलमा ५ अंक जोडेर नवौं स्थानमा रहेको छ । च्यासल ५ खेलमा ४ अंक जोडेर १३औँ स्थानमा रहेको छ ।