काठमाडौँ । प्रधानमन्त्री शेरबहादुर देउवाले नेपाल क्रिकेट संघ (क्यान) ले क्रिकेट खेलाडीहरुलाई गरेको कारवाहीका विषयमा चासो प्रकट गरेका छन् ।

बालुवाटार स्रोतका अनुसार शुक्रबार बिहान नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ सँगको भेटवार्तापछि प्रधानमन्त्री देउवाले क्यानका अध्यक्ष चतुरबहादुर चन्दलाई फोन गरेर खेलाडीलाई कारवाही गरेको विषय के हो ? भनेर प्रश्न गरेका थिए ।

‘क्यानले के गरेको हो यो ? प्रचण्डजीले पनि यसमा चासो राख्नुभएको छ, मिलाउनुस् है’, प्रधानमन्त्री देउवाको भनाइ उधृत गर्दै उनको सचिवालयले भन्यो।

यसअघि गत बुधबार क्यानको बोर्ड बैठकले राष्ट्रिय टोलीका कप्तान ज्ञानेन्द्र मल्ल र उपकप्तान दीपेन्द्रसिंह ऐरीलाई पदमुक्त गरेको थियो ।

मल्लको पदमुक्तपछि क्यानले राष्ट्रिय क्रिकेट टोलीको कप्तानमा युवा लेग स्पिनर सन्दीप लामिछानेलाई नियुक्त गरेको थियो ।