सप्तरी । सप्तरीमा दुर्घटना हवात्तै बढेको छ । प्रायः दैनिक रुपमा हुने दुर्घटनाका कारण व्यक्ति घाइते हुनुका साथै ज्यान समेत गुमाइरहेका छन् । जिल्लामा दुर्घटनाको तथ्यांक डरलाग्दो छ ।

पछिल्लो १७ महिनाकै तथ्यांक हेर्दा १ हजार भन्दा बढी दुर्घटना भएको छ । यो दुर्घटनामा १ सय २९ जनाको मृत्यु भएको छ । गत आर्थिक बर्ष २०७७/०७८ को १२ महिना र चालू आ.ब.को मंसिर २७ गतेसम्म ११ सय १५ वटा दुर्घटना भएको छ ।

गत आर्थिक बर्ष २०७७/०७८ मा जिल्लाभरि ७ सय ३१ वटा दुर्घटना भएको छ । दुर्घटनामा ८७ जनाको मृत्यु भएको छ । ३ सय ८५ जना गम्भीर घाइते र ७ सय ७३ जना सामान्य घाइते भएको जिल्ला प्रहरी कार्यालय सप्तरीले जनाएको छ ।

कार्यालय प्रमुख एसपी अवि नारायण काफ्लेका अनुसार चालू आर्थिक बर्ष को साउन देखि मंसीर २७ गतेसम्म ३ सय ८४ वटा दुर्घटना भएको छ । यो दुर्घटनामा ४२ जनाको मृत्यु भएको छ भने सय जना गम्भीर तथा ४ सय ९४ जना सामान्य घाइते भएका छन् ।

गत आर्थिक बर्ष २०७७/०७८ को १२ महिनामा सबारी साधनबाट रु १ करोड ८४ लाख, ७ सय ३० राजस्व संकलन भएको छ । यस्तै, चालू आ.ब.को मंसीर २७ गतेसम्म रु ७६ लाख राजस्व संकलन भएको छ ।