काठमाडौं । प्रहरीले जागिर लगाइदिन्छु भनी ठगी गरेको आरोपमा एकजनालाई पक्राउ गरेको छ।

पक्राउ पर्नेमा सर्लाही घर भई हाल काठमाडौँको बबरमहल बस्ने ३८ वर्षीय सञ्जीव कुमार साह रहेका छन्। साहले आफू अर्थ मन्त्रालयको लेखा अधिकृत भएको भनेर जागिर लगाइदिन्छु भन्दै लाखौँ ठगी गरेको बताइएको छ।

उनले भक्तपुर घर भएका उत्सव सुजखुलाई एभरेस्ट बैंकको उपत्यकाको कुनै पनि स्थानमा जागिर लगाइदिन्छु भन्दै २ लाख रुपैयाँ ठगी गरेको प्रहरीले जानकारी दिएको छ।

सुजखुको उजुरीको आधारमा अपराध महाशाखाको टोलीले साहलाई नियन्त्रणमा लिएको हो। आवश्यक कारबाहीका लागि उनलाई महानगरीय प्रहरी परिसर टेकु पठाइएको प्रहरीले बताएको छ।