एजेन्सी । बुधबार मध्यान्ह भारतीय रक्षा प्रमुख (चीफ डिफेन्स स्टाफ) विपिन रावतसहित १४ जना चढेको हेलिकप्टरग्रस्त दुर्घटना भयो ।

भारतीय सञ्चार माध्यमका अनुसार रावत र उनकी पत्नीसहित १४ जना सवार भारतीय सेनाको एमआई-सीरीज हेलिकप्टर तमिलनाडुको कुन्नुरस्थित घना जंगलमा खराब मौसमका कारण दुर्घटना भएको हो।

समाचार एजेन्सी एएनआईले दुर्घटनाग्रस्त हेलिकोप्टर ध्वस्त भएको जनाएको छ । एएनआइले १४ जना हेलिकोप्टरमा सवार भएको उल्लेख गरेको छ । तर, ९ जनाको मात्र नाम खुलाएको छ ।

यता, भारतीय संचारमाध्यम आजतकले घटनामा ११ जनाको मृत्यु भएको जनाएको छ । मिलिट्री हस्पिटलमा पुर्याएका १४ मध्ये ११ जनालाई हस्पिटलले मृत घोषित गरेको आजतकले उल्लेख गरेको छ ।

हेलिकप्टरमा सैनिक प्रमुख विपिन रावत, उनकी पत्नी मधुलिका रावत, ब्रिगेडिएर एल एस लिडर, लेफ्टिनेन्ट कर्णेल हरिन्दर सिंहका अलावा सैनिकहरु गुरुसेवक सिंह, जितेन्द्र कुमार, विवेककुमार, बी साइ तेजा र हाभ सतपाल रहेको एएनआईले जनाएको छ ।

दुर्घनामा परेका रावत र उनकी पत्नी मधुलिकाको अवस्था अहिले पनि अज्ञात नै रहेको छ। दुर्घटनाको विषयमा केही बेरमा रक्षामन्त्री राजनाथ सिंहले सदनलाई सम्वोधन गर्ने बताइएको छ ।