कैलाली । लम्कीचुहा नगरपालिका-१ लम्की चौराहका २३ वर्षीय भुपेन्द्र बडुवालको हत्या भएको घटनामा संलग्न रहेको अभियोगमा १२ जनालाई प्रहरीले पक्राउ गरी सोमबार सार्वजनिक गरेको छ । साथै, घटनामा संलग्न अन्य ९ जना अभियुक्तहरूको खोजी भइरहेको प्रहरीले जनाएको छ।

पक्राउ पर्नेहरूमा लम्कीचुहा नगरपालिका -३ चिसापानी बस्ने २३ वर्षीय महेश रावल, २० वर्षीय धिरज भन्ने दिपेन्द्र शाही, २० वर्षीय आर्यन देवकोटा, १९ वर्षीय मदन शाही, सोही नगरपालिका-१ बस्ने २२ वर्षीय कपिल श्रेष्ठ, १८ वर्षीय किशोर, सोही नगरपालिका-५ बस्ने २८ वर्षीय विकास खड्का, टिकापुर नगरपालिका-१ बस्ने २३ वर्षीय प्रबिण रिमाल, सोही नगरपालिका-१ ब्लक नम्बर २५ बस्ने बर्दिया राजापुर नगरपालिका-७ घर भएका २१ वर्षीय रोहित आले, सोही ठाउँ ब्लक नम्बर १४ बस्ने २५ वर्षीय सोहन शाह, बर्दगोरिया गाउँपालिका-२ झगढपुर बस्ने २५ वर्षीय लोकेन्द्र कुँवर र बर्दिया ठाकुरबाबा नगरपालिका-३ गोदाना बस्ने २६ वर्षीय सन्तोष भन्ने सविन जंग शाही रहेका छन् ।

टिकापुर नगरपालिका-१ स्थित सिद्वार्थ होटल नजिकै अपरिचित ब्यक्तिहरुको धारिलो हतियार प्रहारबाट गम्भीर घाइते भएका भुपेन्द्रलाई उपचारको लागि टिकापुर अस्पताल लगेकोमा उपचारको क्रममा मृत्यु भएको थियो ।

लम्की, चिसापानी, टिकापुरलगायतका क्षेत्रमा नदीजन्य पदार्थ तथा वन पैदावारको ठेकापट्टाको विषयलाई लिएर एकै समूहबीच मनमुटाव र वैमनश्यता उत्पन्न भई दुई समूहका युवाहरूबीच झै-झगडा हुन थालेपछि एकआपसमा आक्रमण गर्ने योजना बनाएको प्रारम्भिक अनुसन्धानबाट खुल्न आएको प्रहरीले जनाएको छ।

प्रहरीका अनुसार टिकापुरमा लुकेर बसेका कपिल श्रेष्ठले भुपेन्द्रलाई लिन बोलाएपछि टिकापुर गएको अवस्थामा आर्यन देवकोटा समेतले भुपेन्द्रलाई फेला पारी हामीविरुद्ध टिकापुर आएको भन्दै करिब २ किलोमिटरसम्म लखेटी उक्त होटेल नजिक पुर्‍याएपश्चात धारिलो हतियार प्रहार गरी भागेको प्रहरीले जानकारी दिए।

घटनामा पक्राउ परेका १२ जना र फरार ९ जना गरेर २१ जनाविरुद्ध कर्तव्य ज्यान मुद्धा दायर गरिएको जिल्ला प्रहरी कार्यालय कैलालीले जनाएको छ ।

प्रहरीका अनुसार नविन, धिरज, आर्यन, मदन, निशान्त, विकास, प्रविण, रोहित, सोहन, चिरञ्जीवी, हिमाल, विकास खड्का, रोशन, अशोक र हेमन्त शाहीलाई मुलुकी अपराध संहिता २०७४ को दफा १७७ (२) बमोजिम हुने सजाय (जन्म कैद) मा सोही संहिताको दफा ४१ (जीवित रहेसम्म) बमोजिम कैद सजाय माग दाबी गरिएको छ।

यस्तै, लोकजंग शाही, महेश रावल, कपिल श्रेष्ठ र जयन्द्र शाहलाई दफा १७७ (२) बमोजिम (जन्म कैद) सजाय माग दाबी गरिएको प्रहरीले जनाएको छ । साथै, लोकेन्द्र कुँवर र सविनजंग शाहीलाई दफा ३६ (३) (क) बमोजिम कसुर गरे सो सरह जन्म कैदको सजाय माग दाबी गरिएको छ।