एजेन्सी । भारतमा विवाहको दिन जन्ती लिएर बेहुला नआएपछि बेहुलीले बेहुलाको घरमै पुगेर धर्ना दिएकी छिन् ।

विवाहको दिनभर बेहुला आउने बाटो हेरेर बसेकी बेहुली साँझसम्म पनि वेहुला नआएपछि उनकै घरमा पुगेर धर्ना दिएकी हुन् ।

भारतको बरमपुरमा दुलही आफ्नी आमासँग दुलहाको घरमा धर्ना दिन पुगेकी हुन् । दुलहीले विवाहको दिन दुलहा जन्ती लिएर उनको घर नपुगेको बताएकी छिन् ।

भारतीय सञ्चार माध्यम आजतकमा प्रकाशित समाचार अनुसार यी दुईले केही दिन अघि अदालती विवाह गरेका थिए र दुबैको परिवारले विशेष व्यक्तिहरुको उपस्थितिमा पारम्परिक हिन्दु रिति–रिवाजमा पुनः विवाह गर्ने निर्णय गरेका थिए ।

बेहुलीका अनुसार उनको परिवारले जन्तीको घण्टौं प्रतिक्षा गरे । बेहुलीले थुप्रै पटक बेहुलालाई फोन र मेसेज पनि पठाइन् । उनका अनुसार बेहुलाले न त फोन उठाए न मेसेजको जवाफ दिए, न नै उनको घरमा जन्ती आयो । त्यसपछि उनी सिधै केटाको घरमा पुगिन् र धर्ना दिन थालिन् ।

यसबारे स्थानीय प्रहरीले थप अनुसन्धान सुरु भइसकेको जनाएको छ ।