चितवन । सौराहमा जारी नेकपा एमालेको दशौं राष्ट्रिय महाधिवेशनमा विहान १० बजेका लागि बोलाइएको बन्द सत्र साँझ ७ बजे शुरु हुने भएको छ ।

अध्यक्ष केपी शर्मा ओलीले आइतबार विहान १० बजे नै बन्दसत्रमा उपस्थित हुन आग्रह गरे पनि बन्दसत्र रोकेर छलफलमा जुटेका उनले अझैसम्म पदाधिकारीमा सहमति जुटाउन सकेका छैनन् ।

केन्द्रीय सदस्यहरुको सूची बनाउने जिम्मा चार नेतालाई दिएका उनले पदाधिकारी भने आफैले टुंग्याउने बताएका थिए । ओलीले संगठन विभाग प्रमुख विष्णु पौडेलका साथै नेताहरु शंकर पोखरेल, पृथ्वीसुब्बा गुरुङ र प्रदीप ज्ञवालीलाई केन्द्रीय सदस्यहरुको सूची बनाउन दिएका हुन् ।

चार नेताले केन्द्रीय सदस्यहरुको सूची तयार पारेर अध्यक्ष ओलीलाई बुझाइसकेका छन् । अब ओलीले अन्तिम रुप दिने र बन्दसत्रमा प्रस्तुत हुने बताइएको छ । स्रोतका अनुसार केन्द्रीय सदस्यहरुको सूचीमा वर्तमान केन्द्रीय सदस्यहरुलाई निरन्तरता दिइएको छ भने अरु नाम क्लस्टर मिलाएर थपिएको छ ।

यता, ओलीकै निर्देशन मानेर बन्दसत्र सञ्चालन हुने होटल सेभेर स्टारमा पुगेका प्रतिनिधिहरु भने ७ घण्टा कुर्दा पनि बन्दसत्र सुरु नभएपछि अलमलमा परेका थिए ।

प्रतिनिधिहरुलाई अहिलेसम्म कुराएर साँझ ७ बजे मात्र बन्दसत्र सुरु हुने माइकिङ गरिएको छ । ७ बजे सुरु हुने बन्दसत्रका लागि महाधिवेशन प्रतिनिधिहरुलाई खाना खाएर आउन भनिएको छ ।