जनकपुरधाम । धनुषाको पूर्वी सिमानामा पर्ने कमला नदीमा बिहीबारदेखि धामी–झाँक्रीसहितको भूत मेला सुरु भएको छ ।

प्रदेश २ को धनुषा र सिरहा जिल्ला छुट्याउने कमला नदीको किनारमा प्रत्येक वर्ष कार्तिक पूर्णिमामा अनौठो तथा भूत मेला लाग्ने गर्छ ।

धनुषासहित सिरहा, सप्तरी, महोत्तरी, उदयपुर र सीमावर्ती भारतको मधुवनी, दरभङ्गा, समस्तीपुर, जयनगरसहित विभिन्न स्थानबाट ठूलो संख्यामा सर्वसाधारण कमला नदीमा स्नान गर्न आउने गरेका छन् ।

कार्तिक पुर्णिमाको अवसरमा धनुषाको बरेर्वा घाट, मल्हनिया घाट, इनर्वा घाटसहित कमला नदीको किनारमा मेलाको आयोजना समेत गरिएको स्थानीयहरु बताउँछन् ।

कमला नदीमा स्नान गरेपछि तान्त्रिक विद्यासिद्ध हुने जनविश्वासका साथ बिहीबारदेखि नै भक्तजनको भीड लागेको छ ।

ठूलो संख्यामा मानिस बिहीबार बिहानैदेखि कमला नदीको तटमा पुगेका छन् ।

विभिन्न गाउँ तथा भारतबाट मेलामा सहभागी हुनका लागि कमला नदीमा श्रद्धालुको भीड लागेको देखिन्छ ।