काठमाडौँ । सरकारले आज (मंसिर १ गते) देखि ई पासपोर्टको परीक्षण वितरण थालेको छ।

यसैबीच सरकारले पहिलो विद्युतीय राहदानी (ई–पासपोर्ट) संस्कृतिविद् सत्यमोहन जोशीलाई प्रदान गरेको छ ।

बुधबार त्रिपुरेश्वरस्थित राहदानी विभागको सभा हलमा आयोजित कार्यक्रममा परराष्ट्रमन्त्री डा.नारायण खड्काले जोशीलाई पहिलो ई-पासपोर्ट प्रदान गरेका हुन्।

ई पासपोर्टको आजबाट परीक्षण वितरण थालिए पनि राहदानी विभागले ई पासपोर्ट वितरण कार्य एक साताभित्रै नियमित र पूर्ण सेवामा परिणत गर्ने जनाएको छ ।

सरकारले हाल चल्तीमा रहेको मेसिन रिडेबल पासपोर्ट (एमआरपी) लाई विस्थापित गर्ने गरी ल्याएको ई पासपोर्टलाई अघि बढाउन गत वर्षको सेप्टेम्बर महिनामा फ्रान्सेली कम्पनीसँग सम्झौता गरिएको थियो ।

गत वर्षको डिसेम्बर २३ मा करिब साढे दुई अर्ब रुपियाँ लागतको सम्झौता ई-पासपोर्टका लागि भएको थियो ।