काठमाडौं । पछिल्लो २४ घण्टामा देशभर थप २ सय ९५ जनामा कोरोना सङ्क्रमण पुष्टि भएको छ भने सोही अवधिमा ४७८ जना सङ्क्रमणमुक्त भएका छन्

स्वास्थ्य तथा जनसंख्या मन्त्रालयका अनुसार ५ हजार २२५ पीसीआर परीक्षणमा २६० र ३ हजार १८ एन्टिजेन परीक्षणमा ३५ जना गरी २९५ जनामा संक्रमण पुष्टि भएको हो । पछिल्लो २४ घण्टामा जम्मा ८ हजार २४३ जनाको कोरोना परीक्षण गरिएको मन्त्रालयले जनाएको छ ।

हाल देशभर ७ हजार २७८ जना सक्रिय सङ्क्रमित रहेका छन् । हालसम्म कूल सङ्क्रमितमध्ये ९ लाख ९७ हजार ९२६ जना सङ्क्रमणमुक्त भइसकेका छन् ।

नेपालमा निको हुने दर ९७.७ प्रतिशत रहेको छ । त्यस्तै, कोरोना सङ्क्रमणबाट थप २ जनाको मृत्यु भएको छ । हालसम्म देशमा कोभिड–१९ बाट ज्यान गुमाउनेको सङ्ख्या ११ हजार ४७१ को पुगेको छ । देशभर थप ३४ हजार ७१६ जनाले कोरोनाविरुद्धको खोप पनि लगाएका छन् ।